ESB-vörumerki

Unnt er að fá skráð vörumerki í Evrópusambandinu í heild í stað þess að leggja inn sjálfstæðar umsóknir í hverju aðildarríki þess fyrir sig. Umsókn um svokölluð Evrópuvörumerki (e. European Union Trade Mark - EUTM) er beint til Vörumerkja-og hönnunarskrifstofu Evrópusambandsins (e. European Union Intellectual Property Office - EUIPO) sem sér um þessar skráningar.

EUIPO er sjálfstæð opinber stofnun og starfar á grundvelli reglugerða nr. (EB) 207/2009 frá 26. febrúar 2009 um Evrópuvörumerki og nr. (EB) 6/2002 frá 12. desember 2001 um Evrópuhönnun.

Með EUTM-skráningum fæst vernd í öllum 27 aðildarríkjum sambandsins og njóta þessar skráningar sömu verndar eins og landsbundnar skráningar í aðildarríkjunum. Þá er Evrópusambandið aðili að Madrid-skráningarkerfinu í vörumerkjum, þannig að hægt er að tilnefna sambandið í umsókn um alþjóðlega skráningu vörumerkis. Sé Evrópusambandið tilnefnt er það EUIPO sem fer með alla meðferð umsóknarinnar. 

Heimasíða EUIPO